مصطفي طفل مش زي اي طفل, بدل ما يلعب زي الاطفال اللي في سنه
... ينضرب و يتعذب و يتهان و ينطرد و بس ...
الحكايه بإختصار ....
١٤ يناير كان اخر امتحان في مدرسته عثمان ابن عفان في #الرحاب .. مصطفي روح مع مامته و سألته عن باقي فلوس درس ١٥ جنيه فقال لها انه سلفهم لاصحابه اللي كانوا عاوزين يشتروا بسكوت فالام شيماء راحت ماسكه السلك اللي بتضربه بيه دايما .. فالطفل نط من الشباك و هرب.
مصطفي نام في الشارع لحد تاني يوم الصبح فصاحبه محمد محمود شافه .. استأذن مامته و راح بات عنده في البيت يوم ١٥ و ١٦ يناير.
يوم ١٦ يناير مامته عرفت مكانه فراحت بمنفاخ عجل لمنزل والده محمد محمود اللي مكانش موجود في البيت مع مصطفي بيشتروا عصير و بسكوت من تحت البيت .. فطلبت من ام محمد محمود تتصل بالولاد و متقولش ان الام موجوده ... اول ما وصل نزلت فيه ضرب بالمنفاخ و تخبطه في الحيطه لحد ما نزل مدخل العماره و طلبت من عامل ديلفري كان متواجد بالصدفه يمسكه بحجة انه حرامي و قلعته الشبشب و قالتله اي بيت هعرف انك فيه هجيلك و اطردك منه عشان تفضل عايش في الشوارع.
الطفل مشي حافي في البرد لحد جامع موجود في سوق الرحاب عشان ياخد شبشب يلبسه, و محمد محمود و صحابه قعدوا يدوروا عليه بعد ما الام مشيت لحد ما وصلوا لمكانه و رجعوا بيه علي بيت محمد محمود و اتغدي معاهم ..
اتصلت صديقه والده الطفل و اسمها غاده بوالده محمد محمود و عرضت استضافة الطفل مصطفي عندها لحد ما مامته تهدأ .. و بالفعل الطفل راح عند صديقة الأم و نام عندها و تاني يوم المغرب عرفنا ان صديقة الام طردت الطفل.
مدرسه في المدرسه فوجئت بالطفل تاني يوم بيتصل بيها من تليفون طالب زميله اسمه ابراهيم محمد عبد العليم و بيقول لها ان صديقة مامته اخدته في عربيتها و رمته في مكان صحراوي بالليل و فضل يمشي بالشبشب اللي اخده من الجامع لحد ما شاف اوتوبيس مكتوب عليه التجمع الاول فركبه و رجع علي السوق بتاع الرحاب اللي قابل فيه صاحبه.
والد صاحبه ابراهيم وافق ان الطفل يبات عنده في البيت لمده ٣ ايام و شاف ان الطفل طبيعي و مؤدب و مش فاهم امه بتقول عليه ليه الكلام ده !
وكيله في المدرسه عارفه حكاية مصطفي عرضت تستضيف الطفل في بيتها و بالفعل الطفل راح عندها لمده يوم و تاني يوم راح معاها المدرسه بالرغم من ان المدرسه اجازه بس مفيش مكان الطفل يروحه.
المدرسه عملت اجتماع عشان يشوفوا هيعملوا ايه في حالة الطفل مصطفي اللي ملوش مكان يعيش فيه و قرروا يتصلوا بوالدة الطفل عشان تستلمه و اتصدموا لما عرفوا منها انها عامله محضر تغيب للطفل و رفضت تستلمه من المدرسه و قالت سلموه للقسم و انا هبقي استلمه منهم.
مدرسه في المدرسه اسمها ايمان فتحي اخدت الطفل و اللي كان بيترعش و بيعيط و بيقول ان ماما عارفه ظابط في القسم اسمه شريف ناجي في قسم الرحاب و ماما كلمته قبل كده و جالي بعربية دوريه و موتوسيكل و اخدوني القسم و ضربوني كام قلم خفيف و قالولي اسمع كلام ماما و متزعلهاش تاني (دي رواية الطفل).
المدرسه وصلت الطفل قدام القسم و فضلت واقفه لحد ما الطفل دخل جوه و سابته ..
تاني يوم المدرسين اتصلوا بوالدة الطفل عشان يطمأنوا ان الطفل وصل لها عن طريق القسم فوجئوا ان الام بتدعي انها استلمت الطفل من المدرسة عادي و متعرفش ايه حكاية القسم دي و انكرت انها استلمته من القسم .... و طبعا ده مستحيل لأن مدرسين المدرسه هما اللي وصلوا الطفل لقسم الرحاب !
الطفل علي جسمه اثار تعذيب بيقول انها بتضربه بالسلك و المدرسين شافوا ايده محروقه بمياه سخنه من فتره علي حسب رواية الطفل و متعور في وشه و قال لهم ان ماما اللي ضربتني و مازالت العلامه في وشه ... دا غير علامات في رجله و ضهره عباره عن خطوط و أثار ضرب.
حاليا احنا و المدرسين منعرفش الطفل فين و ايه مصيره و خايفين تكون رمته في اي حته زي ما عملوا قبل كده.
اسماء مدرسين المدرسه للتأكد من الروايه :
مدام نرمين شرف
مدام داليا حسين
مدام ايمان فتحي
استاذ احمد سامي
استاذ حمزه
مدام غاده
مدام هاله
استاذ غبد الرازق
عم محمد موظف الأمن
والد الطفل محمد محمود
والد الطفل ابراهيم محمد عبد العليم
........................................
إرسال تعليق