السطور الجاية نقلا عن المحلل الاقتصادي محمد نجم، بيشرح ببساطة ليه بترتفع أجور الممثلين نسبيا مقارنة بمهن أخرى:
--
بمناسبة الكلام عن أجر امير كرارة فى مسلسل الاختيار وربطه بمرتب الشهيد احمد منسي ..
.
طيب بنفس المقياس ..
- نجوم مسلسل WOLF التركي ، اللي بيجسد قصة حقيقية عن بطولة بعض عناصر قوات الشرطة الخاصة أثناء انقلاب ٢٠١٦ ، اخدوا فلوس مخدهاش الابطال الحقيقيين طول عمرهم... ليه محدش اتكلم عن اجورهم؟!!
.
- نجوم فيلم LONE SURVIVOR اللي جسد قصة حقيقية عن بطولة أمريكية في أفغانستان ٢٠٠٧ ، اخدوا فلوس مخدهاش الابطال الحقيقيين طول عمرهم.... ليه محدش اتكلم عن اجورهم؟!!
.
دة سوق وعمالة وسعر سوقي وموازنات وارباح وتكاليف وحسابات عائد علي الاستثمار وتسويق ودعاية ...الخ
.
وعشان تستمر الصناعة والناس تقبض والعجلة تدور ، لازم الشركات تكسب وتشتغل وفقا لقوي العرض والطلب بدون اي تشوهات فى السوق ...
.
ومش عشان العمل وطني يبقي يكون عمل خيري. دة محصلش فى تركيا ولا امريكا ولا الهند ولا اي بلد فى الدنيا.
.
ليه "مارك وولبيرج" ياخد 4 مليون دولار عن دوره فى "lone survivor" اللي استغرق منه كام شهر شغل فقط , في حين ان الظابط اللى هو مثل بطولته كان بياخد 90 الف دولار فى سنة كاملة !
.
نفس المقياس علي امير كرارة - انا معرفش أجره كام , بس هنقول رقم تقريبي - ليه هياخد مليون جنيه عن دوره فى "الاختيار" اللى استغرق منه كام شهر شغل فقط فى حين ان الظابط اللى هو مثل بطولته كان بياخد رقم فى حدود 120 الف جنيه فى سنة كاملة !
.
ليه معظم الناس فى كل بلاد الدنيا مرتباتها لا تساوي 1% من مرتبات الممثلين والمطربين ولاعبي الكرة والرياضات المختلفة ؟!
.
الاجابة بسيطة , العرض والطلب , وهبسطها فى 3 حالات :
.
- الحالة الاولي:
.
انت محاسب , عندنا 300 الف محاسب فى السوق , الشركات محتاجة 250 الف بس , بالتالي اجرك هيتراوح بين 4000 و 6000 جنيه , للاسباب دي :
- فيه منك كتير ومعدل نمو الخريجين من تخصصك مرتفع جدا
- معندكش مهارة نادرة او صعبة او متميزة
- الطلب علي شغلانتك عادي , محصلوش طفرات
- مش هتحققلي ربح خرافي عشان ادفعلك اجر خرافي
.
- الحالة التانية :
.
انت مهندس متخصص فى البرمجة فى سوق زي مصر بيمر بفترة تحول نحو التكنولوجيا المالية والمصرفية والشمول المالي , اصلا دفعتك كلها علي بعض لا تتجاوز 10 الاف والسوق محتاج 30 الف (ارقام افتراضية)....يعني العرض اقل من الطلب
.
سعرك لازم يكون اعلي من المحاسب , لان :
- اللى زيك قليلين فى السوق
- مهارتك نادرة فى السوق
- الطلب عليك مرتفع واعلي من العرض
- هتحققلي ربح كبير
.
وبالتالي لازم اجرك يكون اعلي من المحاسب , ودة فى الاوقات العادية.
.
طب تخيل فى الاوقات الغير عادية زي الدول اللى بتتحول نحو الرقمنة والأتمتة , يعني الطلب هيرتفع , سعرك هيحصله ايه ؟ هيتضاعف
.
- الحالة التالتة :
.
انت فنان قدرت تجذب ملايين المشاهدات لافلامك وتجيب ارباح لاي شركة منتجة لاعمالك , اذن المعروض منك قليل جدا , محدش يقدر يحقق الارقام دى ويلفت انتباه هذا الكم من الجماهير.
.
طب فيه منك كام يقدرو يعملوا نفس اللى انت عملته ؟
سنويا بنتكلم فى احتمالية بزوغ نجم واحد او اتنين بالجماهيرية دي , اللى من وزن جماهيرية امير كرارة او محمد صلاح , ان لم يكن كل 5 سنين يبزغ نجم واحد فقط
.
بالتالي مستحيل سوق مفيهوش غير 5 انفار يتساوي بسوق فيه 10 الاف يتساوي بسوق فيه 300 الف .
.
- هل دة وضع يخص مصر فقط ؟!
.
لا طبعا , دة فى كل العالم وفى أي زمن وفى أي دولة , بس احنا واجب علينا نكرر كل سنة شرح وسرد الاساسيات دى كل رمضان عشان فيه ناس مش فاهمة وليها حق تفهم .
.
بس فيه ناس تانية بنكتب الكلام دة ليها , عشان تبطل مزايدات سياسية رخيصة وهدفها معروف خاصة لما نلاقيها طالعة من اسطنبول والدوحة ,
.
او ناس تانية بتقوم بادعاءات تدين سطحية عن قد ايه المسلسلات بتلهينا عن العبادات وانتو اساسا لو بتعبدو ربنا صح مكنتوش هتحتاجوا تعملو الاستعراض دة ,
.
وناس تانية معترضة عشان المساجد قفلت والاقتصاد موقفش (يشمل صناعة الدراما) , فى حين ان المنطق بيقول مستحيل اشتغل فى المصنع من البيت بس ممكن اصلي فى البيت عادي وربنا دينه يسر وهيعذرنا سبحانه وتعالي , بس هو لازم نعمل شو واستعراض عن قد ايه احنا متدينين جامدين وعايزين ربنا يشوفنا واحنا بنزايد علي غيرنا وبنعلمهم الادب ,
.
وناس تانية بتلقي اتهامات بالفساد والسرقة للفنانين وهما لا سرقوك ولا نصبو عليك , انت بس اللي غاوي تعلق شماعات فشلك علي غيرك وعندك امراض نفسية مش عارف تصرفها فين.
--
بالعامية_المصرية
إرسال تعليق