الحسد حقيقه ؟!
من فتره إنتشرت يافطه لتلات إخوات أساتذه دكاتره في طب القصر العيني وصفحات كتير نزلت بوستات يارب نص حظ صلاح حمزه اللي هو والدهم
من إسبوع بالظبط إتوفت دكتوره منهم وفاه مفاجئه صادمه من غير أي تعب مسبق ... !
كان تريند مشهور في الفتره اللي فاتت صوره البنت اللي مع باباها والصفحات بتنزل تقول قد ايه هما جمال وبيقارنوا بينهم وبين حد تاني وبيضربوا بيهم المثل في الجمال
الراجل والد البنت أصابه السرطان وبيتعالج منه حاليا بعد ما شعره وقع وملامحه دبلت !
بنت بتحكي عن مدرس كان بيديها درس وكانت المجموعه كبيره بتقول انها وزمايلها فضلوا يحسبوا يا تري بيكسب قد ايه ... كانت دايما المدرس بيقولهم جمله محدش يبص لحد في رزقه مش يعرف وراها ايه ... بالصدفه قابلته في مول ومعاه تلاته اولاد كلهم من ذوي الاحتياجات الخاصه ولابسين اجهزه بتساعدهم علي المشي لما شافته زعلت جدا من نفسها وسلمت عليه وقالتله محدش يعرف وراها ايه !
رجل الاعمال المشهور خالد بشاره كان مثال للشاب المجتهد ورجل الأعمال الناجح اللي شركته حققت طفره في مجال البناء والاتصالات ومعدل نمو رهيب وكان الكل بيتكلم عن نجاحه في لحظه كل ده راح في حادثه علي الدايري الشباب والفلوس كل ده راح !
الشخص الناجح في حياته لو الشخص اللي معاه فلوس أو الشخص اللي ربنا رزقه الجمال في الشكل أو الجسم
محدش يعرف كل واحد من ده وراه ايه شايل هموم قد ايه مشاكله اللي بيعانيها في حياته ! يا تري هو بعد كل ده سعيد !
دايما بنشوف القشره من برا ونبص عليها وننبهر بيها بس كل ما بندخل في التفاصيل اكتر ونعري القشره دي كل ما بيتضح لينا ان الحياه دي ولا حاجه قدام لحظه سعاده أو اننا نفقد حد عزيز علينا يخلينا تعساء لاخر العمر
متحسدش ومتبصش لغيرك في رزقه لان رزقك مكتوبلك وهتاخده سواء في الشكل في الفلوس أو حتي العلم رزقك هتاخده كامل بس وانت بتسعي وبتتمني الخير لغيرك مش وانت في مكانك واقف مكسل تتحرك وبتحسد غيرك !
وإفتكر إن كل واحد مهما كان وضعه ومكانته فهو في معركه دايما بيخوضها في حياته حتي لو مش باين تفاصيلها ليك !
عن النبي صلى الله عليه وسلم قال: "العين حق ولو كان شيء سابق القدر لسبقته العين " .
إرسال تعليق