كان عندنا في البلد ...
أي زوجه تقول لأخو زوجها يابا فلان حتى لو أصغر منها ب 20 سنه , و أخت الزوج اسمها عمّه , ده لا قهر ولا استعباد , دي موده ومحبه .
كان عندنا في البلد ...
أي راجل بشنب ملو هدومه يقول لأي ست أكبر منه يا خاله حتى لو ماتقربلهوش خاله فلانه , لو كان عندها ألف فدان يقول لها يا خاله , ولو بتبيع جرجير قدام الجامع يقول لها يا خاله .
كان عندنا في البلد ...
العم بيتقال له أبوك فلان , روح هات كذا من بيت أبوك فلان , اللي هو عمك , و الجد بيتقال له سيدي فلان و أي راجل عجوز بيتقال له يا سيدي
كان عندنا في البلد ..
لو حد تعب البلد تتقلب , ولو حد مات كله يعزي و يجهز أكل للضيوف اللي جايين يعزو من بره البلد ( كل بيت يجهز أكل ) , و في الفرح كله يحضر من غير كارت دعوه , من غير قاعه , البلد بتبقى هي القاعه .
كان عندنا في البلد ...
ناس بتنام بعد العشا , إيديهم خشنه و مشققه , بينامو مهدودين و مبتسمين , لا سمعو عن أمراض نفسيه ولا يعرفو السيبراليكس و لا المهدئات ولا لعنو الظروف ولا الدكتور قال لهم محتاجين تطلعو شرم أسبوع عشان تغيرو جو .
كان عندنا في البلد ...
ضحكه بتطلع من القلب و كلام حلو , صباحك نادي , خلّي عنك , العوافي , من يد ما نعدمهاش .
كان عندنا في البلد ...
طرنبة مايه عمرها أكبر من عمر كشك عالخليج و شجرة عمرها أكبر من عمر أمريكا .
كان عندنا في البلد ...
وشوش بتعرف تبتسم و عواجيز في ملامحهم خريطة بلد , و عيال صغيره بتاخد الحكمه والفلسفه من القاعده مع الاجداد ( لما بيقعد مع سيده ) , مش من كتب ( الخواجات ) .
كان عندنا في البلد
شباب زي الورد كلهم شهامه و عمرهم ماعاكسو بنت في الشارع وكان فيه بنات يختشوا يرودوا علي التليفون الارضي واخواتهم موجودين
كان عندنا في البلد
رجاله بتسعي علي اكل عيشها طول اليوم وما يتعشاش غير في بيته مع ولاده وستات تحترم رجالتها تغسل هدومه وتكوي طاقيته وجلابيته وتمسح جزمته في هدومها وهيا سعيده ولا نكدت عليه في يوم وقالت هرمونات
كان عندنا في البلد ...
أدب و خجل و توقير للكبير و فيها حياه , حاجات كتير اختلفت بس لسه فيها حياه , الله يلعن المدنيه عالتطور على أم عوجة اللسان على بليز ع ميرسي عالماكياج و الماسكات و الوشوش
إرسال تعليق