بث مباشر مباراة الاهلي ونهضة بركان

قروا حكايته المؤلمه واحمدوا ربنا علي النعمه اللي احنا فيها ودا العنوان اي حد حابب يعمل خير

قريه القصبي شرق مركز صان الحجر محافظه الشرقيه تلفون ٠١٠٠٢٩١٠٢٨٩

انا بموت والله العظيم كل يوم من الوجع والتعب😓😓..ارجوكم سيبوني افضفض معاكم ولو جزء بسيط جدا لان انا فعلا تعبت جدا حتي لو محدش هيقرأ ف عادي جدا جدا بالنسبالي اهم حاجة عندي افضفض وارتاح لو لثواني لان انا يعتبر شايل جبال ع قلبي

انا واحد لسه ب بداية حياته عشت 25 سنة فيهم كل ما تشتهيه الانفس...

من وجع لحزن لجوع لضرب لفرح لحاجات كتير

كنت بيجي عليا ايام اكل الثلاث طقات عيش وشاي ده وانا لسه عيل عندي بتاع 7 سنين ، كنت بطلع اشتغل ف الأراضي الزراعيه طول اليوم ب 5 جنية وكنت بنضرب بيهم مليون مره وبتاكل مره واحده بس ف اليوم كان اللي بياخد حد ارضه يشتغل عنده كان بيقتله طول اليوم مقابل 5 جنية دا كله عشان ناكلها بالحلال بس ، طلعت اشتغل ف المعمار وشوفت الذل اللي محدش شافه من ضرب ب الحديد والخشب و الخراطيم والايد والرجل انضرب كل انواع الضرب اللي ممكن تتخيلها ف حياتك واتشتمت كل انواع الشتائم اللي ممكن تسمعها ف حياتك ده كل كان مقابل اني اتعلم صنعة المباني واكون بنا ده ما كان يوميا مقابل طقم ب 50 ج كل سنة ده كله كان مقابل اني مركزش ف التعليم واروح بس ع قد الامتحانات ويا انجح يا اسقط بس اهو كنت بنجح دا كله كان مقابل طفولتي اللي مفرحتش بيها لحظة دا كله مقابل اني كنت عايش فتره كبيره اوي بعيد عن اهلي متغرب ف بلاد الناس خدتها من بور سعيد لشرم الشيخ

تقريبا عشت 16 سنة ما بابن الأراضي الزراعيه والمعمار من كتر الضرب ايدي دي اتكسرت 9 مرات كنت بشوف نفسي وانا مرفوع فوق وانزل مهبود ع الارض ومكنش اقدر اعيط ولا اقول اه بالعكس كنت بقوم اجري اشوف اعمل ايه وانا قصرت ف ايه عشت طفولتي كلها يعتبر بنام ع الارض وع شكاير الاسمنت الفاضيه وكنت مجبر تقوم اذان الفجر حتي لو التلج نازل عليك دا كله كان مقابل 5 جنية ف الاسبوع باين ولما شديت حيلي شوية كنت بشتغل عامل ف المعمار عشان كانت يوميته اغلي شوية عشان المصاريف كنت لسه عيل عندي 12،13 سنة بزوق برويطة حديد فيها 120 طوبة ، 4 شكاير أسمنت ، مليانه رمل وكنت مجبر تمشي بيها وتزقها ف قلب الرمل عشان متمشيش من الشغل ويقولوا عليك ضعيف، ضحيت بكل حياتي وانا صغير لعند ما ربنا اكرمني وبقيت صنايعي مبقتش بنضرب ولا بقيت بزق برويطة ولا بقيت اتشتم ولا بقيت انضرب بقيت صنايعي بس وقتها بقا وانا لسه عندي 14، 15 سنة كنت بربط طرحة مز بتاعة امي ع ضهري من شدة الوجع عشان اقدر اوطي وارفع ضهري 2000 مره ف اليوم ماهي كانت طريحة الصناعي 2000 طوبة ف اليوم ، دا كله وكنت مجبر ساعة الغدا ب 2 جنية اكل بس يعني ب جنية فول و بجنبة عيش

16 سنة ف الوضع ده وقسما بالله العلي العظيم كل اللي بقوله ده ميجيش 1% من اللي حصلي ومريت بيه

كل ده حصلي وانا لسه عيل مخلصتش 1 ثانوي

و يشاء الله ان بعد التعب والمجهود ده كله وبعد ما وصلت لحاجة كويسة تقدر تعيشني وانا واهلي كويس شوية عن الوضع القديم يشاء ربنا سبحانه وتعالى

يوم السبت 1/5/2010

اقع من الدور الخامس ع سيف بلكونه ف الدور التالت ومن الدور التالت ع الارض ، ع ما نزلت تحت كان فقرات ضهري اتكسرت والنخاع الشوكي عندي اتقطع قطع كامل من عند الصدر ويشاء رب العالمين اني تبقي من مستخدمي الكرسي المتحرك و يبتليني ب شلل نصفي ،

فضلت 5 سنين ف صدمة مش عارف افوق منها 5 سنين واكل شارب نايم ع السرير بتاعي 5 سنين مشوفتش فيهم الشمس كنت 24 ساعه بكلم نفسي معقول انت بقيت كده معقول انت مش هتمشي تاني معقول دا انت يابني كنت يعتبر طوق النجاه لاهلك وخلاص هنبدأ احلامنا واحنا صغيرين تتحقق ، 5 سنين اهلي يصرفوا عليا دم قلبهم كنت بسمع فيهم أبويا وامي بيستلفوا فلوس عشان اروح لدكتور ولا اجيب علاج ولا يعملولي اي حاجة تقريبا اندينوا لطوب الارض عشان يصرفوا بس عليا ده كل وانا كنت بموت من جوايا لدرجة انهم صوتوا عليا مرتين وقالوا اني مُت

بعد الخميس سنين وبعد ما بترت رجلي الاولي من شدة قرح الفراش اللي كل كل رجلي لانها ملقتش علاج كويس ومبقتش اهتمام بدأ انا اتحرك من السرير و اقعد ع كرسي متحرك بس وانا بموت من جوايا بس ما باليد حيله مفيش حاجة مش عارف اعمل ايه وبرضو من قلة الفلوس وقلة الاهتمام القرح كلت رجلي التانية وبترتها هي كان وبقيت مبتور القدمين ، اللهم لا اعتراض ع حكمك يارب أنا كنت صامد قدام اهلي بس من جوايا بتقطع لما تقوم وتنام تلاقي جزء منك مرمي قدامك ف غرفة العمليات ع كيس بلاستيك تبصلها وتعيط وتحس انها هي كمان بتعيط شعور كان قاسي جدا جدا جدا جدا بس ربنا الهمني الصبر عشان خاطر اهلي خصوصا امي

لما بدأت اخرج واروح واجي لقيت نفسي ف دوامه كبيره اوي انا مش قدها كان ف الوقت ده جسمي كله قرح فراش ، وكانت اقل عملية هتكلفني 20 الف طب اجيب 20 الف منين اصلا وانا مش معايا حتي اجرة العربية اورح بيها للدكتور ، قولت هروح الجامعه وفعلا رحت ودخلت غرفة العمليات مرتين ومفيش دكتور عرف يبنجني لان حصلي التواء جامد جدا جدا ف العمود الفقري ، ابويا خاف عليا خدني روحني البيت عارفين انتوا الدورشة انا وقتها دماغي كان فيها دوشة كبيرة اوي اوي اوي اوي مبقتش عارف اعمل ايه كنت دائما بكلم نفسي واقول ليه يارب عملت معايا كده دا انا كنت باكلها بالحلال ليه يارب طب اخواتي دول طب هجيب فلوس منين

وفضلت ماشي ف حكاية الفلوس السلف كتير اوي وكان بيوصل الفلوس اللي عليا ف الصيدلية بس ل 5 الاف جنية

انا واحد عامل 29 عملية كل عملية ليها حكاية قد اللي انا حكيته دلوقتي ده كل يوم كان بيعدي عليا كان بيحصل فيها حاجات قد اللي انا حكيته دلوقتي دي

انا عشت 26 سنة لعند دلوقتي مشوفتش فيهم يوم حلو معشتش فيهم حتي طفولتي احلامي كلها كانت بقلم رصاص ف لحظة انتهت

كل اللي حكيته دلوقتي ده ميجيش 1% من اللي مريت بيه انا لسه محكتش حاجة من اللي حصلت لي ف ال 10 سنين اللي عدوا دول من 1/5/2010 لعند النهاردة

محدش فيهم مجبور يقرأ حاجة بس انا فعلا تعبت جدا جدا وبحاول حتي افضفض عن نفسي

للحديث بقيه ان شاء الله لو احياني الله الذي طلبت ملاقاته فى القريب العاجل فاللهم ✋... طبعا الكلام دة #نقلا عن الشاب السيد ربنا يشفيه ويعافيه يارب

أرجوكم يجماعة كلنا نعمل #شيير للبوست لوجه الله علشان يوصل للمسؤولين ووزارة الصحة